Ölkədə idarəçilik sistemində struktur islahatları aparılmaqdadır. Bir çox qurumlar ləğv edilir, birləşdirilir və ya yeniləri yaradılır. Qeyd edək ki, xeyli müddətdir ölkədə narazı qalınan əsas dövlət qurumları içində iki strukturun xüsusi olaraq adı çəkilirdi. Onlardan biri Nəqliyyat Nazirliyinin tərkibində fəaliyyət göstərən Nəqliyyat Müfəttişliyi idisə, digəri də Dövlət Yol Polisi Xidmətiydi. Bildirək ki, bu iki nəhəng dövlət qurumundan artıq biri yoxdur. Və işin qəribə tərəfi odur ki, Nəqliyyat Müfəttişliyi ləğv edilərək, ən çox şikayət olunan digər quruma, Baş Dövlət Yol Polisi İdarəsinə (BDYPİ) verilib. Nəqliyyat Nazirliyindən sonra kütləvi ictimai narazılığın ünvanlandığı əsas qurumlardan biri də Daxili İşlər Nazirliyinin Baş Dövlət Yol Polisi İdarəsi (DYP) olduğu üçün, bu qurumun da adının dəyişdirilərək, yenidən formalaşdırılması məsələsi müzakirə olunmaqdadır.

BDYPİ də ləğv olunur?

Nəqliyyat Nazirliyinin səlahiyyətsizləşdirilməsindən sonra daha bir neçə qurumun da eyni aqibət yaşayacağı proqnozlaşdırılır. Artıq proqnozlara uyğun olaraq bəzi qurumlar artıq ləğv olunub. Məsələn, MTN artıq yoxdur. Eyniylə, Dövlət Satınalmalar Agentliyi də dövlət başçısının fərmanı ilə ləğv edilib. Sırada isə digər qurumların olacağı istisna deyil. Bununla bağlı verilən məlumatlarda qeyd olunur ki, BDYPİ-nin ləğv edilməsi məsələsi də artıq gündəmə gəlib. Məsələ belədir ki, Nəqliyyat Müfəttişliyinin birləşdirildiyi BDYPİ-nin ləğv edib, yerində Dövlət Avtomobil Müfəttişliyinin yaradılması nəzərdə tutulur.
Belə bir zərurətin yaranmasının tutarlı əsasları təbii ki, var. Məsələ belədir ki, artıq təkcə mediada deyil, eyni zamanda sosial şəbəkələrdə də DYP-nin fəaliyyəti ən ağır formada tənqid edilir. Və bu tənqidlər əvvəlki dönəmlərdən fərqli olaraq, hansısa şikayətlərin əsasında deyil, elə canlı şəkildə çəkilmiş videogörüntülərin əsasında formalaşıb. Cəmiyyətin tələbi budur ki, ya BDYPİ ləğv olunmalıdır, ya da tamamilə dəyişdirilməlidir. Yəni, ən azından keyfiyyət dəyişikliyi baş verməlidir.

DYP narazılıq və “bespridel” ünvanı

Son illər sosial şəbəkələrdə və mediada yol polisi haqqında biabırçı video çarxların yayılması, ictimai rəydə qurumun heç bir nüfuzunun qalmaması DYP-nin ləğvini həqiqətən də zərurətə çevirir. Yeni qurumun yaradılması, həm də DYP-ni ailə biznesinə çevirən, artıq neçə ildir təqaüd yaşını keçsə də, hələ də kreslosunu qorumaq üçün dəridən-qabıqdan çıxan Ramiz Zeynalovun daha yeni və çevik bir kadrla əvəz olunmasına səbəb olacaq. Digər bir tərəfdən, böhran dönəmində dövlət büdcəsini talayan məmurların büdcəni dolduracaq məmurlarla əvəzlənməsi ən doğru yoldur.
Təsadüfi deyil ki, DYP rəsmiləri ASAN xidmətdə ödənilən çərimə çeklərini belə tanımaqdan imtina edir. Bu cür təfəkkürlə, bu cür yanaşma ilə bu qurumun heç bir gələcəyi ola bilməz. Xüsusən də açıq-aşkar hökümətin islahat adddımlarına qarşı çıxırsa…

Çiçəklənən ailə biznesi

Ramiz Zeynalov DİN strukturlarında 1976-cı ildən – təxminən 40 il öncə işləməyə başlayıb. 1994-cü ilin avqust ayından isə Azərbaycan Respublikası Daxili İşlər Nazirliyinin Baş Dövlət Yol Polisi İdarəsinin rəisidir. Deməli, indiki vəzifəsində də 21 ildir oturub. Bu 21 ildə dünya xəritəsi bir neçə dəfə dəyişsə də, R.Zeynalov nə özü, nə vəzifəsi, nə də iş üslubu dəyişməyib. Yol polisinin necə çalışdığını oxucuya ayrıca izah etməyə lüzum görmürük. Görünən dağa bələdçi lazım deyil. Amma biz mümkün qədər Ramiz Zeynalovun dövlət vəzifələrini özü və yaxınları üçün necə biznesə çevirməsinin görünməyən tərəflərini açıqlamağa çalışacağıq.

Generalın biznesini kimlər idarə edir?

Bu sualın çeşidli cavabları ola bilər. Çünki biznes yalnız bir nəfərin idarəçiliyində deyil. Əksinə, hər bir biznes sahəsi üzrə ayrı-ayrı şəxslər təhkim olunub və onların öz vəzifələri var. Bununla bağlı media üzərindən apardığımız araşdırmalarda yer alan məlumata görə, Ramiz Zeynalovun beton zavodları və daş karxanalarının idarəçiliyi DYP-nin alay komandiri, polkovnik Balakişi Əhmədovun nəzarətinə verilib. Hətta bu yaxınlarda Əhmədov Cənub bölgəsində generalın yeni inşa edilmiş zavodunun açılışına belə getmişdi. Amma BDYPİ rəisinin təkcə beton zavodları, daş karxanaları yoxdur. Onun əsas «biznesi» elə rəhbəri olduğu qurumdadır. Yerli MERO-ların fəaliyyətindən xəbərsiz olmayan yoxdur. Nömrə alverindən tutmuş, sürücülük vəsiqələrinə qədər hər şeyin alınıb-satıldığı idarədə bu işlərə nəzarət heç də uzaq bir şəxsə verilməyib. Bu işlər birbaşa onun bacısı oğlu Xəqanidədir ki, o da Tovuz MERO-nun rəisidir. Bakıdan 400 km aralıda yaşamasına baxmayaraq, hesablaşmalar, alqı-satqıların mühasibatlığını həyata keçirən MERO rəisi kəsdiyi başa görə, sorğu-sual edilmir. Təbii ki, o da digər həmkarları kimi, nömrələri təsnifləşdirib müxtəlif qiymətlərə satır. Oxudun, oxumadın fərq etməz, sürücülük vəsiqəsi istəyəndən pulunu alıb, ona sənəd verir. Bu barədə ayrıca bir araşdırmamız olacaq. Və orada Ramiz Zeynalovun bacısı oğlunun gördüyü bir sıra pünhan işlərdən bəhs edəcəyik.
İndi isə qayıdaq yenidən Zeynalovun biznesinə. Onun Tovuzda və ölkənin müxtəlif yerlərində villaları, otelləri, istirahət mərkəzlərinin olduğu da sirr deyil. Məsələn, Tovuzdakı «Ayan Palase» də Zeynalovlardan kənar şəxslərə məxsus deyil. Orada bir gecənin neçə yüz manat olduğunu da bilməyən yoxdur. Avtomobil nömrələri və sürücülük vəsiqələrinin verilməsi sahəsində də hansı biznes maraqlarının güdüldüyü yeni xəbər deyil. Bu sahədə isə R.Zeynalovun etibarlı adamı İmtahan-Qeydiyyat Şöbəsinin rəisi Müşfiq Rəhimovdur. Nömrələrin bir villa qiymətinə, sürücülük vəsiqəsinin isə ən azı 1 000 manata satıldığını bu ölkədə bilməyən yoxdur. Bundan əlavə, R.Zeynalovun bir çox rayonlarda villa və otelləri var. Bu sırada doğulduğu və qardaşı Tofiq Zeynalovun icra başçısı olduğu olduğu Tovuz rayonu xüsusi yer tutur.

Qardaşı Tofiq Zeynalov haqqında

Tofiq Zeynalov da qardaşının iş metodundan bəhrələnərək, rayonda xüsusi pilləli monopoliya sistemi qurub. Bütün “qara işləri”ni isə birinci müavin təyin etdiyi qudası Mahir Həsənova həvalə edib. İş o yerə çatıb ki. rayonda idarə rəhbərləri ilə keçirilən toplantılara da bir qayda olaraq, Mahir Həsənov rəhbərlik edir, Tofiq Zeynalov isə daha çox şəxsi biznesi ilə məşğul olur. Rayondakı bütün təmir-tikinti işləri də M.Həsənova məxsus “Qovlar Təmir Tikinti” MMC tərəfindən aparılır. Bu şirkətə köçürülən vəsaitlərin məbləği isə on milyonlarla ölçülür. Rayonun Maliyyə İdarəsinin rəisi Mübarz Salmanov da başçının dayısı oğludur. Mediada səslənən iddialara görə, büdcə təşkilatlarına köçürülən vəsaitlərdən bir qayda olaraq, 13 faiz tutulur. Bunun 8 faizi icra başçısına ötürülür. Başçının oğlu Qoşqar Zeynalov isə Bakı Dövlət Yol Polisi İdarəsində şöbə müdiri vəzifəsində çalışır.
Q.Zeynalov da öz növbəsində atasının, əmisinin və öz “bisnes”inin hesabına əsl oliqarx övladı kimi kef çəkir, səsi tez-tez dünyanın lüks otel və istirahət mərkəzlərindən gəlir. Qadaşı kimi başçının da Tovuzda bir çox dəbdəbəli malikanələri, restoranları var. Bununla belə T.Zeynalovun Bakıda da dəyəri milyonlarla ölçülən mənzil və mülkləri var ki, bunların bir çoxu kirayə verilib.

Evakuasiya.Az və ya “156” kimindir?

Ramiz Zeynalovun biznesinin əsas istiqamətlərindən biri də “Evakuasiya.az” şirkəti ilə bağlıdır. Belə ki, Bakıda evakuatorlar tərəfindən cərimə meydançalarına aparılan avtomobillərə sürücülər tərəfindən ödənən cərimələr dövlət hesabına yox, şəxsi hesablara gedir. Paytaxtın küçə və prospektlərində qadağan edilmiş yerdə dayanan avtomobilləri ancaq Yol Patrul Xidmətinin əməkdaşının göstərişi əsasında DYP-nin Siqnal İdarəsinə məxsus AP (Azərbaycan Polisi ) serial nömrə nişanlı evakuatorlar tərəfindən cərimə meydançalarına aparıla bilər. Belə olan halda cərimə meydançasına aparılan avtomobilin sürücüsü cərimə edilir və sürücü cəriməni bank vasitəsi ilə dövlətə ödədikdən sonra avtomobilini cərimə meydançasından götürə bilir. Ancaq R.Zeynalov burada da vəziyyəti “incə qayda”da dəyişib. DYP-nin Siqnal İdarəsinə məxsus evakuatorlar cərimə meydançalarında saxlanılır. Əvəzində isə dayanması qadağan edilmiş yerlərdən avtomobillər “Evakuasiya.Az” MMC-yə məxsus “İsuzi” markalı evakuatorlar (üzərinə 156 yazılan) tərəfindən cərimə meydançalarına aparılır və sürücülər cəriməni qeyd olunan MMC-nin hesabına (“Bank Texnika”dakı) köçürdükdən sonra avtomobillərini cərimə meydançasından götürə bilirlər. Beləliklə də, dövlət büdcəsinə köçürülməli olan cərimələr bu yolla kimlərinsə ciblərinə gedir. Vergilər Nazirliyinin saytında “Evakuasiya.az” MMC-nin 24 yanvar 2011-ci ildə qeydiyyatdan keçdiyi, qanuni təmsilçisinin isə Aqil İsmayıl oğlu Zeynalov olduğu göstərilib.

Aqil Zeynalov kimdir?

Bir müddət öncə mediada gedən məlumatlarda bildirilirdi ki, Bakı şəhərində evakuasiya xidməti göstərən bütün avtomobillər satılıb. Maşınların Xəqani Səlimov adlı şəxs tərəfindən Dövlət Yol Polisi İdarəsinin rəisi Ramiz Zeynalovun qardaşı oğlu Aqil Zeynalova satıldığı deyilir: “Lakin bu alqı-satqının pul müqabilində aparıldığı dəqiq məlum deyil. Məlum olan odur ki, Aqil Zeynalovun nəzarətində olan evakuasiya maşınları 2 profil üzrə Bakıda xidmət göstərirlər. 1-ci xidmət növü qəzaya düşmüş və ya xarab olmuş avtomobillərin daşınması, 2-ci xidmət isə DYP-nin sifarişi ilə park etmə qaydalarını pozan avtomobillərin cərimə meydançalarına daşınmasıdır”.
“Evakuasiya.az” MMC ilə eyni ünvanı paylaşan “Azericert” MMC adlı daha bir şirkət var. Şirkət 1 sentyabr 2011-ci ildə qeydiyyatdan keçib. Qanuni təmsilçisi Zamil Faiq oğlu Həsənovdur. Ancaq şirkətin nə işlə məşğul olduğu bəlli deyil. Adı mətbuatda gedən bir neçə yazıda maliyyə dəstəkçisi kimi keçir.

YEKUN

Normalda heç bir şəxsin və qohumlarının hansısa biznes qurumları yaratması və ya ona rəhbərlik etməsi əlavə suallar yaratmalı deyil. Amma R.Zeynalovun 20 ildən artıq, qardaşının isə 10 il eyni vəzifədə olması – bütün qohumların bu həlqədə yer alması, biznes subyektlərinin də birbaşa dövlət kanallarına bağlı olması – artıq ciddi korrupsiya faktıdır. MTN ətrafında baş verən qalmaqal da bir daha göstədi ki, bu cür faktlar ciddi araşdırılmalı və hər kəs layiq olduğu cəzasını almalıdır.(cumhuriyyet.az)

Paylaş