Bakı Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Zaman Əkbərovun (şərti) cinayət işi üzrə məhkəmə istintaqı yekunlaşıb.
Korrupsiya.az.azın əldə etdiyi məlumata görə, hakim Vüqar Quliyevin sədrliyi ilə keçirilən prosesdə hökm oxunub. Məhkəmənin hökmü ilə o, 3 il müddətinə azadlıqdan məhrum edilib.
İttihama görə, hadisə 3 yanvar 2023-cü il tarixdə, gecə saat 1 radələrində paytaxt ərazisində yerləşən evlərin birində qeydə alınıb. Belə ki, 1977-ci il təvəllüdlü Zaman Əkbərov evində olarkən onunla eyni həyətyanı sahədə yerləşən evdə yaşayan, həbsdə olan qardaşının həyat yoldaşının evinin pəncərəsinə yaxınlaşıb. Bu zaman evin içərisində yad kişi – Hafiz Malikovun (şərti) şəxsin olmasını görüb. O, pəncərəni sındırıb nə baş verdiyini aydınlaşdırmaq üçün hər iki şəxsi çölə çağırıb. Daha sonra təqsirləndirilən şəxs Hafizlə mübahisə edib. Nəticədə Zaman əlindəki şişlə zərərçəkmiş şəxsin qarın nahiyəsinə vurub. Daha sonra Hafiz hadisə yerindən qaçıb. Zaman Əkbərov barəsində Cinayət Məcəlləsinin 126.1-ci (Qəsdən sağlamlığa ağır zərər vurma) maddəsi ilə ittiham irəli sürülüb. O, məhkəmədə ifadəsində bildirib ki, toylarda kababçı işləyir.
