“Vergi qanunvericiliyinə edilmiş dəyişiklik nəticəsində mikro sahibkarlıq subyektlərinin bir hissəsinin vergi yükü artacaq”.
Bunu iqtisadçı Samir Əliyev bildirib.
“Əgər mikrosahibkarlar gəlirlərinin 5%-ni dövlətə verirdilərsə, bu aydan başlayaraq 20%-ni büdcəyə ödəməli olacaqlar. Yəni mikrosahibkarların vergi yükü birdən-birə 15% artacaq. Sadə dillə desək, gəlirləri ən azı 15% azalacaq. Mikrosahibkarlar vergi güzəştini bərpa etmək üçün 3 işçi götürməlidir”, – ekspert əlavə edib.
İqtisadçı qeyd edir ki, hökumət başqa ödənişlərə güzəşt tətbiq etməklə zərəri azaltmaq istəyib: “Əslində bu güzəşt vergi yükünün artmasını ciddi qarşılaya bilmir. Güzəştin mahiyyəti odur ki, sizin büdcəyə ödəyəcəyiniz məcburi sosial sığorta ödənişinin 25%-i vergi ödənişindən çıxılır. Bu güzəşt 3 il müddətində qüvvədə olacaq”.
Samir Əliyev daha sonra konkret misallarla problemə aydınlıq gətirib: “Təsəvvür edin ki, sizə il ərzində hər birinin məbləği 3000 manat olmaqla 4 dəfə ödəniş edilib və ümumi mədaxil 12.000 manat olub. 2023-cü ildə sizin büdcəyə ödənişiniz 945 AZN olub. Bunun 600 AZN-i (12000 AZN x 5%) gəlir vergisi, 345 AZN-i (86.25 AZN x 4 ay) sosial sığorta ödənişi şəklində olub.
2024-cü ildə siz 12000 manatlıq ödənişə görə 2658,75 AZN ödəməli olacağıq. Bunun 2400 AZN-i (12000 AZN x 20%) vergi, 258,75 AZN-i (86,25 AZN x 4 ay – 25%) məcburi sosial sığorta ödənişii təşkil edir.
Göründüyü kimi, orta hesabla aylıq dövriyyəsi 1000 AZN olan mikrosahibkarın vergi yükü 78,75 AZN-dən 221.=,56 AZN- yüksəlib. Bura İcbari Tibbi sığorta ödənşini də əlavə etsək, belə çıxacaq ki, bir fərdi sahibkar qazancının 25%-nə qədərini itirəcək”.
İqtisadçının sözlərinə görə, güzəştlərin tədricədən aradan qaldırılması kölgə iqtisadiyyatını genişləndirəcək.