“Dünyada, xüsusən də, inkişaf etmiş ölkələrdə insanların kommunal xərclərində qənaət etmələri adi haldır. Çünki həmin ölkələrdə xərclər kifayət qədər çoxdur. Minimum və orta əməkhaqqı nisbətində yenə də xərclər insanlara xeyli təsir göstərir. Bu ölkələrin vətəndaşları istəməsələr belə, qənaət etməyə məcbur olurlar. Ən birincisi də bu, həyat tərzinə çevrilir. İşıq, qaz, su və digər kommunal xərcləri qədərindən artıq ödəməmək üçün israfla yox, qənaətlə həyatlarını qururlar. Bizdə isə hələ də Sovet sistemindənqalma vərdişlər var…” 

Bu sözləri Korrupsiya.az-a açıqlamasında Milli Məclisin deputatı Vüqar İskəndərov deyib.

Deputat bildirib ki, su, bəlkə də, ən çox israf etdiyimiz nemətdir: “Yaxın illərdə dünyada su da yanacaq növləri kimi həm bahalaşacaq, həm də qıtlığı hiss olunacaq. Hansı ölkələr qənaətlə işlədəcəksə, elə də əziyyət çəkməyəcək. Bu barədə maariflənməyə böyük ehtiyacımız var. Su ilə yanaşı işıqdan, qazdan da qənaətlə istifadə büdcəmizə müsbət təsirini göstərə bilər. Bu, zaman məsələsidir, amma yavaş-yavaş anlamalıyıq ki, hər biri təbii nemətdir. Çalışmalıyıq ki, qənaətlə istifadə edək. Onların sonsuz olmadığını bilək. Dövlət daimidir. Gələcək nəsillər bu gün laqeyd baxdığımız məsələlərdən əziyyət çəkə bilərlər. Gecikmədən, bu gündən başlayaraq diqqətimizi artırmalıyıq. Bunları böyüməkdə olan gənc nəslə də aşılamağa ehtiyacımız var. Biz daha çox uşaqlara, yeniyetmələrə, gənclərə təbliğatı artırmalıyıq. Belə olan halda kommunal xərclərin ödənişində qismən müsbət nəticələr əldə edə bilərik. Hazırda dünyada hibrid avtomobillərə tələbatın artması ilə əlaqədar stimullaşdırma məqsədilə dövlətin gördüyü işlər buna hesablanıb ki, artıq insanlar yanacaqla işləyən maşınlardan daha çox elektrikli maşınlara üstünlük versinlər. Həm ekoloji baxımdan təmizdir, həm də insanların maddi vəziyyətinə müsbət təsir göstərə bilər. Bütün parametrlərlə baxsaq, çox əlverişlidir. Yeni avtomobillər alarkən hibrid, elektrik tipli avtomobillərin alınmasına çalışmalıyıq”.