4 ildir Qarabağ əlilinə borcunu ödəmir, amma məktubla əlilin pensiyasını yarıqat edib
Teref.az: Azərbaycan Respublikası Prezidentinin 20.06.2014 tarixli 569 saylı sərəncamı ilə 2014-cü ilin 1 yanvarına kimi mənzil növbəsində dayanan Qarabağ savaşı əlilləri və şəhid ailələrinin 2014-2018 -ci illər arasında mənzillə təmin olunmaları qərara alınıb. Lakin artıq 2019-cu il başa çatmaq üzrədir, hələ də “beşillik plan”ın 6-cı ildə də icra olunmayacağı göz önündədir. Əmək və Əhalinin Sosial Müdafiəsi Nazirliyi prezidentin sözügedən sərəncamını icra etməyə borclu olsa da, borcunu yerinə yetirməkdən imtina edib və çıxış yolunu. .. prezidentin sərəncamını əlil və şəhid ailələrinin ziyanına dəyişməkdə tapıb. İlin əvvəlində dövlət başçısının həmin 569 saylı sərəncamındakı “2014-2018-ci illər” sözləri “2014-2028 -ci illər “ ifadəsi ilə əvəz olunub. Başqa sözlə, 2014-cü ilin yanvarın 1-ə kimi mənzil növbəsində dayanan əlil və şəhid ailələrinin beş il ərzində yox, 15 il ərzində mənzillə təmin olunmaları təsbit olunub. Göründüyü kimi, prezidentin sərəncamı əlil və şəhid ailələrinin xeyrinə yox, ƏƏSMN məmurlarının özbaşınalığına xidmət edir. Fikrimizcə, Konstitusiya Məhkəməsi “beşillik plan”ın “onbeşillik”lə əvəz olunmasına hüquqi qiymət verilməsini təmin etməlidir . Amma Ana məhkəməyə müraciət etmək elə ƏƏSMN -in görəvi olduğu halda, bunu edərmi? Təsəvvür edin, ƏƏSMN yanında DSMF-in direktor müavini Əminə Seyidzadə nə Prezident sərəncamıını icra edib, nə də dövlətin adından çıxarılan 20.06.2016 tarixli məhkəmə qərarını. Halbuki Konstitusiyanın 149-cu maddəsinə görə prezident sərəncamının, fərmanının, 129 -cu maddəyə görə məhkəmə qərarlarının icrası məcburidir. Əminə xanım Seyidzadə isə , ümumiyyətlə , məhkəmə qərarını görməzliyə vurur. Nə qərarı qəbul etmiş 2 saylı Bakı İnzibati-İqtisadi Məhkəməsinin özü, nə Ədliyyə Nazirliyi , nə də hüquq mühafizə orqanları məmur xanıma “ (kor) gözünün üstündə qaşın var” deyir. Qarabağ əlilinə məhkəmə qərarı ilə borclu edilən ƏƏSMN yanında DSMF-in sosial proqramlar şektoru borcunu ödəməkdən imtina edir, amma Suraxanı icra məmuru Vüsal Əliyevin saxta məktubu ilə xaricdə müalicəyə ehtiyacı olan, düşmən gülləsinin ağ ciyərinin üçdən ikisini apardığı Qarabağ əlilinin pensiyasını “Rəvan” sığorta şirkətinə ödəməklə yarıqat edir! (?) Absurdluğa baxın, borclu olduğu məhkəmə qərarını icra etməyən dövlətin sosial müdafiəsi fondu Qarabağ əlilinin pensiyasını sifarişlə yarıqat edib və hələ də geri tələb etmir. Bəyəm fondun Qarabağ əlilinin pensiyasını hansısa dələduz sığorta şirkətinə ödəmək borcu var? Qarabağ əlilinə yardım etmək, müalicəsini təşkil etmək yerinə cüzi pensiyasını da dələduzlara ödəməyin özü dələduzluqdur. Yeri gəlmişkən, Əminə Seyidzadə Səhiyyə Nazirliyinin xaricdə müalicəyə göndərməyə rəy verdiyi Qarabağ əlillərinin müalicəsinə də özünəməxsus qadağa qoyub ki, nazirlik (ƏƏSMN -red) heç bir xarici ölkə ilə müqavilə bağlamadığından müalicənin təşkili mümkün deyil . Özbaşınalığa fikir verin, nazirlik görəvini icra edib, əlillərin müalicəsini təşkil etmir, xaricdə müalicəyə dövlət büdcəsindən ayrılan vəsaiti mənimsəyir və bu səbəbdən də Qarabağ əlili müalicəsizlikdən dünyasını dəyişir !? Əminə xanım isə utanmadan nazirliyin heç bir ölkə ilə müqavilə bağlamadığını bildirir! Budur əlil-şəhid ailələrinə dövlət qayğısı?
İnzibati və məhkəmə təminatı hüququ Konstitusiyanın 60-cı maddəsi ilə təsbit olunan əsas insan və vətəndaş hüquqlarındandır. Bu hüquqa heç kim qadağa qoya bilməz. Borclunun məhkəmə qərarını icra etməkdən imtinası isə cərimə sanksiyasından tutmuş cinayət məsuliyyətinə qədər cəzalandırılmasına nədən olur. Əlilin Vətən qarşısında borcunu icra edərkən aldığı xəsarətlərə görə ödənilən məbləği başqasının hesabına ödəmək isə daha ağır cinayətdir. Görəsən, Baş Prokurorluq, Hesablama Palatası, Ədliyyə Nazirliyi, Maliyyə Nazirliyi, Maliyyə Bazarlarına Nəzarət Palatası və digər dövlət qurumları ƏƏSMN yanında DSMF-in direktor müavini Əminə Seyidzadənin Qarabağ əlilinin pensiyasını dələduz “Rəvan” sığorta şirkətinə ödəməsinə, əlillərin müalicəsinə, mənzil və digər sosial təminatlarına ayrılan vəsaiti mənimsəməsinə nə vaxt hüquqi qiymət verəcəklər? Əlillər müalicəsizlikdən, sosial müdafiəsizlikdən dünyalarını dəyişəndən sonra?
