Külli miqdarda dələduzluq və hədə-qorxu yolu ilə pul tələb etməkdə təqsirləndirilərək 10 il 6 ay müddətinə azadlıqdan məhrum edilmiş iş adamı Cavad Şeydayev Ali Məhkəməyə kassasiya şikayəti verib. 

İlkin Rəcəbov iş üzrə hakim təyin edilib.

Məlumat üçün deyək ki, Cavad Şeydayev Cinayət Məcəlləsinin 178.3.2 və 182.3.2-ci maddələri ilə mühakimə edilib. İşə Bakı Ağır Cinayətlər Məhkəməsində baxılıb. Məhkəmə Cavad Şeydayevi 178.3.2-ci maddə ilə təqsirli bilərək, 7 il azadlıqdan məhrumetmə cəzası təyin edib. 182.3.2-ci maddə ilə bağlı isə Cavad Şeydayevə bəraət verilib.

Lakin Bakı Apellyasiya Məhkəməsi bəraət hökmünü ləğv edərək, yeni hökmlə Cavad Şeydayevə 10 il 6 ay həbs cəzası təyin edib. Bu iş üzrə 11 nəfər zərərçəkmiş qismində tanınıb.

Problemin kökü Cavad Şeydayevlə Əziz Quliyev adlı şəxs arasındakı mübahisəyə gedib çıxır. Cavad Şeydayev həmin şəxsin etibarından sui-istifadə edərək, 919 min manatını mənimsəməkdə təqsirləndirilir. İş adamı isə iddia edir ki, özü dələduzluğun qurbanı olub.

Mediada gedən məlumatlara görə, o, bildirib ki, Əziz Quliyev Azərbaycan Milli Elmlər Akademiyasının (AMEA) keçmiş prezidenti Ramiz Mehdiyevin yaxın şəxsdir.

Cavid Şeydayevin iddiasına görə, Əziz Quliyev şəxsi əlaqələrindən istifadə edərək işi onun əleyhinə çevirib.

Paylaş