Bir neçə gündür “Azəriqaz” İstehsalat Birliyinə yeni baş direktor – Ruslan Əliyev təyin olunub. Sabiq baş direktor Əkbər Hacıyev isə başqa vəzifəyə təyinat alıb. Yəni islahatlar fonunda “Azəriqaz” İstehsalat Birliyinin baş direktorunun dəyişdirilməsi o deməkdir ki, bu qurumda olan və ya olacaq problemlərin həlli istiqamətində daha çevik addımlar atılmalıdır.
Başlayaq problemlərdən və konkret faktlardan. Hansı ki, bu məsələlər hər bir vətəndaşı narahat edir və qanunu yolları bilmək istəyir.
Elə isə yeni baş direktor Ruslan Əliyevə sabiq Əkbər Hacıyevin illərdir cavablandıra bilmədiyi bir sadə sualı ünvanlamaq istəyirik. Yəqin ki, yeni direktor Ruslan Əliyev bu suallara cavab verəcək qədər təcrübəlidir. Çünki, son vəzifəyə kimi elə “Azəriqaz”-da yüksək vəzifədə çalışıb. Yəni bu işdə naşı deyil.
Bu gün Azərbaycan Respublikasında yaşayan, 18-yaşı olmuş hər bir vətəndaş şəxsi ev sahibi olmaq hüququna malikdir. Bununla yanaşı özünə tikdirdiyi yeni evinə qaz, işıq, su, telefon təminatında da qadağa yoxdur. Amma insanları hələ də bu sayaq məsələlərlə get-gələ salırlar. Prezident İlham Əliyev “Asan Xidmət” mərkəzlərini yaratdı ki, rüşvət olmasın, insanlar qaz, işıq, su idarə müdirləri tərəfindən bezdirilməsin və sairə…
Axı necə olur ki, vətəndaşlar yenə bezdirilir, qanunsuz yollarla məcbur edilir… Axı bu neçə illər davam edəcək? Xəbəriniz varmı ki, bölgələrdə insanlar öz mənzillərinə qaz xətti çəkdirmək üçün hansı zülmlərə qatlaşır? Anlaya bilirsinizmi ki, insanların neçə faizi qapısının qarşısından qaz xətti keçsə də qazla təmin olunmur. Bunun səbəbi bilirsiz nədir? Deyim bilin.
Hər bir abonent evinə qaz xətti çəkilişi həyata keçirmək üçün “Asan Xidmət” də 300-manata yaxın rəsmi pul ödəyir. 1-2 aydan sonra sənədlər hazırlanır və vətəndaşa göndərilir. Əsl müsibət də elə bundan sonra başlayır. Qaz çəkilişini həyata keçirən “Global Services” MMC-nin əməkdaşları vətəndaşa bildirir ki, qaz çəkilişi üçün, filan-filan avadanlıqlar almalıdır, ustaya pul ödəməlidir, traktor gətirməlisən və sairə. Bu rəqəm də təxminən 300 manat edir. Elə bu səbədən də insanlar evinə qaz xətti çəkdirmir. Anlaya bilirsinizmi bunu? “Global Services” MMC-nin Neftçala rayonundakı rəhbərliyi açıq formada bildirir ki, qaz xəttinin çəkilişi üçün sayğaca qədər olan hissəni vətəndaş öz cibindən almalıdır. Doğrudurmu bu, yoldaş Ruslan Əliyev? Qanun beləmi deyir? Yoxsa buda başqa əmmalar var? Əgər bunu vətəndaş alırsa, sıradan bir usta bunu həyata keçirirsə o zaman “Global Services” MMC nəyə və kimə lazımdır? O zaman bu MMC-ni “Azəriqaz”-a bağlayan nədir? Hansı pulla əmək haqqı verir işçilərinə? Podratçı şirkət nə deməkdir, yoldaş Ruslan Əliyev? Bəlkə anladasız, podratçı şirkət “Azəriqaz”-dan layihəni niyə udur?
Əcəba, hörmətli Ruslan Əliyev bu qanunun harasında yazılıb? Hər kəs bilir ki, sayğaca qədər olan hissə dövlət tərəfindən həyata keçirilir. “Global Services” MMC-nin rəhbəri kimdir? Bu MMC-ni vətəndaşları bezdirmək, soymaqmı üçün yaradıblar? “Global Services” MMC-nin rəhbəri kimdirsə buna bir dur deyən tapılacaqmı? //bizimxeber.az//
