Bir neçə gün əvvəl Bakının mərkəzində erməni musiqisi dinləyə-dinləyə Azərbaycan xalqını təhqir edən şəxslərin çəkib ictimailəşdirdiyi video-görüntülər yaymışdıq. İddia etmişdik ki, bu şəxslər həqiqi hərbi diversiya qrupu olmasa belə, Ermənistanın Azərbaycana qarşı yürütdüyü informasiya savaşı casuslarıdır. Bu isə haranısa partlatmaqdan daha aşağı partizanlıq deyil və xarici əks kəşfiyyatın ən önəmli hədəflərindən biridir. Mümkündür ki, həmin şəxslər də Bakıya məhz bu məqsədlə – erməni əks-kəşfiyyatı tərəfindən Azərbaycan xalqının öz dövlətinə inamını sındırmaq, zəiflik kompleksi yaratmaq missiyası ilə göndəriliblər.
Teref.az yazır ki, ovqat.com-un paylaşdığı xəbər sosial şəbəkələrdə ciddi rezonans doğurdu və əksər mətbu orqanlar tərəfindən tirajlandı. Görünür, qaldırdığımız məsələ hüquq-mühafizə orqanları tərəfindən də ciddi qəbul edildiyindən qanun keçikçilərimiz dərhal hərəkətə keçib, həmin “diversiya qrupu”nu yaxalayıblar.
Verilən məlumata görə, paytaxtın yollarında qurulmuş kameralara düşən həmin nəqliyyat vasitəsi təsbit olunub və təxribatçılar saxlanılıb. İlkin araşdırmalar nəticəsində erməni diversiya qrupu olmaqda şübhələndiyimiz şəxslər Gürcüstan azərbaycanlıları çıxıb. Şübhəlilər ilkin ifadələrində Bakıda yaşayan qohumlarıgilə gəldiklərini etiraf ediblər.
Bəs bu ziyarət xoşməramlı xarakter daşıyıbsa, Azərbaycan xalqının heysiyyatı ilə oynamaları və bunu videolaşdırıb yaymaları nəyə qulluq edirmiş?
Hüquq mühafizə orqanları hazırda bu suala aydınlıq gətirməyə çalışırlar.
Əldə etdiyimiz məlumata görə, yaxın zamanlarda hüquq mühafizə orqanları keçirdikləri əməliyyatla bağlı birgə bəyanat yayacaqlar.
