Bakının Sabunçu rayon Kürdəxanı qəsəbəsi və Məhəmmədi qəsəbələrindəki yeni yaşayış massivlərində sakinlər özləri öz hesablarına yollarını təmir edirlər.
Kürdəxanı və Məhəmmədi qəsəbələrinin bir hissəsində kanalizasiya xətləri olsa da, yeni yaşayış massivlərində hələ ki, kanalizasiya xətti yoxdur. Bu da qış aylarında sakinlərin probleminə çevrilir. Yağan yağış suları evləri və yolları bərbad hala salır. Demək olar ki, hər il öz aralarında pul toplayaraq yollarını təmir edən sakinlər aidiyyatı qurumların biganəliyindən gileyləniblər. Əgər sakinlər özləri yolları təmir edirsə, belə bir sual yaranır ki, onda bələdiyyə kimi bir qrum nəyə lazımdı?!
Ərazidəki evlərin həm də kupçası yoxdur. Hamısı demək olar ki, icra hakimiyyətinin verdiyi sərəncamla tikilib. Yeni yaşayış massivində evlərə nə vaxt kupça veriləcəyi və kanalizasiya xətti çəkiləcəyi hələki sual altındadır. Bu yaxında Məhəmmədi bələdiyyəsinin sakinlərdən vergi tələbi də etirazla qarşılanıb. Sakinlər deyirlər ki, əgər yolu biz təmir ediriksə, ona vergi niyə ödəməliyik.
Moderator.az-ın əməkdaşının ərazidən çəkdiyi fotoları təqdim edirik.
